एजेन्सी- टिममा फर्केका क्रिस्टियानो रोनाल्डोले गोल गरेपछि म्यानचेस्टर युनाइटेडले बिहीबार युरोपा लिगमा सेरिफ टिरास्पोललाई सजिलै ३-० गोलअन्तरले हराएको छ । युरोपा लिगको समूह ‘ई’ को ओल्ड ट्रायफोर्डमा भएको खेलमा रोनाल्डोले आफ्नो खेल जीवनको ७०१ औं गोल गरेका हुन् ।

इंग्लिस प्रिमियर लिगमा चेल्सविरुद्धको खेलमा सब्स्टिच्युट खेलाडीका रूपमा मैदानमा प्रवेश गर्न अस्वीकार गरेपछि उनलाई कारबाहीस्वरूप टिमबाट बाहिर राखिएको थियो । टिरास्पोलविरुद्ध भने उनले ८१औं मिनेटमा गोल गरे ।

त्यस अगाडि डिएगो डालट र मार्कस रसफोर्डले युनाइटेडका लागि गोल गरे । प्रिमियर लिगको शीर्ष स्थानमा रहेको आर्सनललाई भने पीएसभी आयनहोभनले २–० अन्तरले पराजित गर्‍यो । हारका बावजुद आर्सनल समूह ‘ए’ को शीर्षस्थानमै रहेको छ ।

बिहीबारका अन्य प्रमुख खेलमा रिय बेटिसले लुडोगारेट्सलाई २–०, एएस रोमाले एचजेक हेलसिन्कीलाई २–१ र रियल सोसिडाडले ओमानिया निकोसियालाई २–० ले पराजित गरे ।