काठमाडौं - राष्ट्रिय स्वतन्त्र पार्टी (रास्वपा) ले नवनिर्वाचित प्रतिनिधिसभा सदस्यहरूका लागि मंगलबार र बुधबार दुई दिने अभिमुखीकरण कार्यक्रम सञ्चालन गर्ने भएको छ। ग्वार्कोस्थित रोयल टुलिप होटलमा मंगलबार बिहान १० बजेदेखि कार्यक्रम सुरु हुनेछ।

पार्टीले यस पटकको अभिमुखीकरणलाई थप व्यवस्थित र अनुशासित बनाउन कडा आचारसंहिता लागू गरेको छ। कार्यक्रमका मुख्य बुँदाहरू यस प्रकार छन्:

• मोबाइल निषेध: प्रशिक्षण अवधिभर हलभित्र मोबाइल फोन प्रयोग गर्न पाइने छैन।
• अतिथि र परिवार भेटघाटमा रोक: कार्यक्रम स्थलमा परिवारका सदस्य, साथीभाइ वा कुनै पनि अतिथिलाई भेट्न र होटलमा आमन्त्रण गर्न निषेध गरिएको छ।
• सावधानी र गोपनीयता: सहभागीहरूले कार्यक्रम स्थलमा फोटो खिच्न वा बाह्य व्यक्तिहरूसँग बैठक गर्न पाउने छैनन्।
• पोशाक र बसाइ: सांसहरूले 'व्यवसायिक क्याजुअल' (Business Casual) पोशाक लगाउनुपर्नेछ। यो आवासीय कार्यक्रम भएकाले सहभागीलाई पुर्‍याउन आउने चालक वा अन्य व्यक्तिको खाना र बस्ने व्यवस्था सहभागी स्वयंले मिलाउनुपर्ने पार्टीले जनाएको छ।

महामन्त्री कविन्द्र बुर्लाकोटीका अनुसार, दुई दिने प्रशिक्षणको समापन सत्रमा पार्टी सभापति रवि लामिछानेले नवनिर्वाचित सांसदहरूलाई विशेष सम्बोधन गर्ने कार्यसूची रहेको छ।