काठमाडौं - सर्लाहीको बागमती नगरपालिकाका निलम्बित प्रमुख भरतकुमार थापालाई विशेष अदालतले भ्रष्टाचार मुद्दामा दोषी ठहर गर्दै कठोर सजाय सुनाएको छ। चर्चित 'भरत ताल' निर्माण परियोजनामा सरकारी स्रोतको दुरुपयोग गरेको अभियोगमा उनलाई ८ वर्ष कैद र १० करोड रुपैयाँ जरिवानाको फैसला भएको हो।

गत साउन २१ गते नै विशेष अदालतले मेयर थापा तथा नगरपालिकाका दुई कर्मचारी, विमलकुमार पोखरेल र सागर पौडेललाई ताल निर्माण गर्दा प्रयोग भएको नदीजन्य पदार्थ (ढुंगा, गिटी, बालुवा) अपचलन गरेको कसुरमा दोषी ठहर गरेको थियो। सोही मुद्दामा अभियोग लगाइएका अन्य प्रतिवादीहरूले भने सफाइ पाएका छन्। अदालतले हालै गरेको फैसलामा दोषी ठहर भएका तीनै जनालाई सजाय निर्धारण गरेको हो।

अदालतको ठहरअनुसार, थापाले भ्रष्टाचार निवारण ऐन, २०५९ को दफा २० को उपदफा (१) अनुसार गैरकानुनी रूपमा सम्पत्ति आर्जन गरेको पनि प्रमाणित भएको छ। कैद र जरिवानाका अतिरिक्त, उनलाई पीडित राहत कोषका लागि ४० लाख ३९ हजार १३१ रुपैयाँ क्षतिपूर्तिबापत जम्मा गर्न पनि आदेश दिइएको छ।

थापा २०७९ सालको वैशाखमा सम्पन्न स्थानीय तहको निर्वाचनमा नेकपा (माओवादी केन्द्र) को तर्फबाट उम्मेदवार बन्दै नगर प्रमुखमा निर्वाचित भएका थिए। भ्रष्टाचारको मुद्दा चलेसँगै उनी स्वतः पदबाट निलम्बनमा परेका थिए।