काठमाडौं - अन्तर्राष्ट्रिय युवा दिवस २०२५ को अवसरमा पद्मकन्या बहुमुखी क्याम्पसको स्वतन्त्र विद्यार्थी युनियन (स्ववियु) ले युवाको मानसिक स्वास्थ्य र जलवायु न्यायका विषयमा एक विशेष प्यानल छलफल कार्यक्रम आयोजना गरेको छ।

'युथ फर पिपुल प्लानेट - मेन्टल हेल्थ एन्ड क्लाइमेट जस्टिस' शीर्षकमा आयोजित उक्त कार्यक्रममा १६ देखि ४० वर्ष उमेर समूहका युवाहरूको मानसिक स्वास्थ्यको वर्तमान अवस्था र त्यसलाई कसरी सन्तुलनमा राखेर जीवनलाई सहज बनाउन सकिन्छ भन्ने विषयमा गहन विमर्श गरिएको थियो।

कार्यक्रमको प्रभावकारिताबारे बोल्दै पद्मकन्या क्याम्पसकी स्ववियु सभापति भुपेश्वरी ऐर"भूपी" ले उक्त छलफल अत्यन्तै उपलब्धिमूलक र व्यवहारिक भएको बताउनुभयो। "युवा नीति र ब्रेन ड्रेनजस्ता जल्दाबल्दा विषयमा छलफल गर्नुभन्दा पहिले हाम्रा युवाहरूको मानसिक स्वास्थ्य कस्तो छ भनेर बुझ्न जरुरी छ," उहाँले भन्नुभयो। उहाँले युवाको समग्र विकासका लागि मानसिक स्वास्थ्यलाई प्राथमिकतामा राख्नुपर्नेमा जोड दिनुभयो।