एजेन्सी - धेरैजसो फुटबल खेलाडीहरू आफ्नो २०-२२ वर्षको उमेरमा विश्वकप खेल्ने सपना देख्छन् र ३० कटेपछि सन्यासको सोच बनाउँछन्। तर केप भर्डका ४० वर्षीय गोलकिपर भोजिन्हा (जोसिमार जोसे एभोरा डियास) को कथा बिल्कुलै फरक छ। उनले फिफा विश्वकपको स्टेजमा पाइला टेक्नका लागि जीवनका ४० वसन्तहरू पर्खिनु पर्यो। सोमबार राति स्पेनविरुद्ध मैदानमा उत्रिँदै गर्दा उनले प्रमाणित गरिदिए कि यदि मनमा दृढ इच्छाशक्ति र धैर्यता छ भने सपना पूरा हुन उमेरले कहिल्यै छेक्दैन।

 
फिफा विश्वकप २०२६ अन्तर्गत समूह 'H' को खेलमा बलियो टोली स्पेन केप भर्डमाथि पूर्ण रूपमा हाबी भएको थियो। फेरान टोरेस, मिकेल ओयार्जाबालदेखि लिएर युवा स्टार लामिन यामलसम्मका विश्वस्तरीय स्ट्राइकरहरूले लगातार गोलको प्रयास गरिरहे। तर, केप भर्डको पोस्ट अगाडि ४० वर्षका यी पाका खेलाडी कुनै अभेद्य पर्खाल जस्तै उभिए। उनले खेलभरि एकपछि अर्को गर्दै ७ वटा उत्कृष्ट 'सेभ' गरेर स्पेनको हरेक प्रहारलाई असफल तुल्याइदिए र खेल ०-० को बराबरीमा सकाउँदै आफ्नो देशलाई ऐतिहासिक अंक दिलाए।

 
सन् २०१२ देखि लगातार आफ्नो देशका लागि खेलिरहेका भोजिन्हाको खेल जीवन सहज थिएन। उनले माल्दोभा, रोमानिया, साइप्रस र पोर्चुगलका साना क्लबहरूमा ओझेलमा परेर वर्षौंसम्म संघर्ष गरे। तर, उनले कहिल्यै हार मानेनन्। आज ९० क्याप जितिसकेका यी कप्तान इजिप्टका एसाम एल हादारी (४५ वर्ष) पछि विश्वकपमा डेब्यु गर्ने विश्वकै दोस्रो सबैभन्दा जेठो खेलाडी बनेका छन्। एटलान्टाको मैदानमा उनले देखाएको यो प्रदर्शनले उनलाई केवल खेलको हिरो मात्र बनाएन, बरु इतिहासकै एउटा सुनौलो पानामा उनको नाम अंकित गरिदियो।
 
भोजिन्हाको यो ऐतिहासिक सफलता हामी सबैका लागि एउटा ठूलो पाठ हो। जब संसारले भन्छ कि 'अब तिम्रो उमेर ढल्कियो, तिमीले सक्दैनौ', त्यतिबेला आफ्नो क्षमतामाथि विश्वास गरेर मैदानमा उत्रिनु नै असली विरता हो। जहाँ मानिसहरू ४० वर्षमा जीवनको उत्तरार्ध सोच्न थाल्छन्, त्यहाँ भोजिन्हाले आफ्नो करियरको सबैभन्दा ठूलो सुरुवात गरे। त्यसैले, आफ्ना सपनाहरूलाई कहिल्यै मर्न नदिनुहोस्। मिहिनेत जारी राख्नुहोस्, किनकि तपाईंको समय पनि अवश्य आउनेछ, जसरी ४० वर्षको उमेरमा भोजिन्हाको आयो।