काठमाडौँ। नेपाल भ्रमणमा रहेकी भियतनामकी उपराष्ट्रपति भो थी आन सुआनले सोमबार राष्ट्रपति रामचन्द्र पौडेलसँग शिष्टाचार भेट गरेकी छन्। शनिबार काठमाडौं आइपुगेकी उपराष्ट्रपति सुआनले राष्ट्रपति भवन शीतल निवासमा पौडेलसँग भेटवार्ता गरेकी हुन्।

भेटका क्रममा राष्ट्रपति पौडेलले नेपाल र भियतनामबीच व्यापार, पर्यटन, लगानी र प्रविधि हस्तान्तरणका क्षेत्रमा द्विपक्षीय आर्थिक सम्बन्ध प्रगाढ बनाउने थुप्रै सम्भावना रहेको औंल्याएका थिए। उनले यी क्षेत्रमा द्विपक्षीय सहकार्यलाई तीव्रता दिन नेपाल सरकार इच्छुक रहेको जानकारी गराए।

सो अवसरमा भियतनामकी उपराष्ट्रपति सुआनले नेपालले सन् २०३० सम्ममा मध्यम आय भएको र भियतनामले सन् २०४५ सम्ममा उच्च आय भएको मुलुक बन्ने लक्ष्य राखेकाले सन् २०३० अगावै दुई देशबीच बृहत् सम्बन्धको खाका (फ्रेमवर्क) बनाउन आवश्यक रहेकोमा जोड दिइन्। राष्ट्रपति पौडेलका प्रेस सल्लाहकार किरण पोखरेलले यसबारे जानकारी दिएका हुन्।

उपराष्ट्रपति सुआनले संस्कृति, खेलकुद र पर्यटनका क्षेत्रमा पनि सहकार्य गर्नुपर्ने आवश्यकता औंल्याइन्। उनले अन्तर्राष्ट्रिय शान्ति स्थापनाका लागि नेपालले देखाएको अग्रसरता र जलवायु परिवर्तनका असरबारे गरेको प्रतिबद्धताबाट आफू प्रभावित भएको समेत बताइन्।

राष्ट्रपति पौडेलले नेपाल हाल कृषि, पर्यटन, उत्पादन तथा जलविद्युत जस्ता क्षेत्रमा लगानीमार्फत आर्थिक-सामाजिक रूपान्तरणमा केन्द्रित रहेको जानकारी गराए। उनले भियतनामले आफ्नो अर्थतन्त्रलाई विश्वकै गतिशील अर्थतन्त्रको रूपमा विकास गर्न सक्षम भएकोमा खुसी व्यक्त गरे।

उनले विशेषतः बौद्ध धर्म नेपाल र भियतनाम दुवै देशका जनताबीचको गहिरो सम्बन्ध सेतु रहेको उल्लेख गर्दै लुम्बिनीलाई धेरै भियतनामीले जीवनमा एकपटक दर्शन गर्नुपर्ने पवित्र स्थलका रूपमा हेर्नुपर्ने बताएका थिए।

भियतनामकी उपराष्ट्रपति सुआन आजै (सोमबार) स्वदेश फर्किंदैछिन्।