काबुल:तालिबान लडाकुले पाकिस्तानको सीमास्थित नाकालाई आफ्नो नियन्त्रणमा लिएको दाबी गरेको छ ।

दक्षिणी कन्धार प्रान्तमा डुरन्ड लाइनस्थित स्पिन बोल्डक जिल्ला, स्थानीय व्यापारी मार्ग र बजारमाथि कब्जा गरेको तालिबानले दाबी गरेको हो ।

सामाजिक सञ्जालमा साझा गरिएको भिडियोमा कन्धार नजिक स्पिन बोल्डक क्रसिङमाथि सेतो झन्डा लगाइएको देखिन्छ ।

नाका आफूहरूको नियन्त्रणबाट बाहिर गइसकेको बारे अफगानिस्तानका अधिकारीहरूले अस्वीकार गरेको छ । यद्यपि सामाजिक सञ्जालमा तालिबान लडाकु पाकिस्तान सीमामा सुरक्षाबलका साथ कुरा गरिरहेको देखिन्छ ।

यता, पाकिस्तानी अधिकारीहरूले पनि तालिबानले नाका कब्जामा लिएको बताएका छन् । त्यस क्षेत्रका व्यापारीहरूले पनि सडक र बजार तालिबानको कब्जामा गइसकेको बताएका छन् ।