तनहुँ - पृथ्वी राजमार्ग अन्तर्गत तनहुँको व्यास नगरपालिका वडा नं. ३ र ४ जोड्ने मादी नदीमा जिप दुर्घटना हुँदा तीन जनाको मृत्यु भएको छ। शनिबार राति करिब साढे ११ बजे उक्त जिप दुर्घटनामा परेको हो।

जिल्ला प्रहरी कार्यालय तनहुँका अनुसार, दमौलीबाट चापाघाटतर्फ जाँदै गरेको ग २ च ५७६० नम्बरको जिप मादी नदी पुलको रेलिङ भाँचेर नदीमा खसेको थियो।

मृत्यु हुनेहरूमा व्यास नगरपालिका–५ का कुशल मगर, प्रविन मगर र कुमार मगर रहेका छन्। त्यस्तै, दुर्घटनामा परी चालक रोहित गुट्टा र धीरज रौनियार घाइते भएका छन्।

घाइतेमध्ये रौनियारलाई दमौली अस्पतालमा प्राथमिक उपचारपछि थप उपचारका लागि पोखरा रिफर गरिएको छ। चालक गुट्टाको भने दमौली अस्पतालमै उपचार भइरहेको प्रहरीले जनाएको छ। जिपमा पाँच जना सवार थिए।