काठमाडौं - पञ्जाब किङ्स इन्डियन प्रिमियर लिग (आईपीएल) क्रिकेटको फाइनलमा प्रवेश गरेको छ। मंगलबार राति भएको क्वालिफायर-२ मा मुम्बई इन्डियन्सलाई ५ विकेटले पराजित गर्दै पञ्जाबले उपाधिका लागि रोयल च्यालेन्जर्स बेंगलुरुसँगको भेट पक्का गरेको हो। यो जितसँगै आईपीएलले नयाँ विजेता पाउने निश्चित भएको छ, किनकि पञ्जाब र बेंगलुरु दुवैले हालसम्म उपाधि जितेका छैनन्।

अहमदावादस्थित नरेन्द्र मोदी स्टेडियममा मुम्बईले दिएको २०४ रनको विशाल लक्ष्य पञ्जाबले १९ ओभरमा ५ विकेट गुमाएर पूरा गर्‍यो। पञ्जाबको जितमा कप्तान श्रेयस अय्यर नायक बने। उनले छक्का प्रहार गर्दै टोलीलाई अविस्मरणीय जित दिलाए। श्रेयसले मात्र ४१ बलमा ५ चौका र ८ छक्कासहित अविजित ८७ रनको विस्फोटक इनिङ्स खेले।

उनलाई नेहल वाधेराले ४८ रन तथा जोस इंग्लिसले ३८ रन बनाउँदै राम्रो साथ दिए। मुम्बईका लागि बलर अश्विनी कुमारले २ विकेट हात पारे।
यसअघि, टस हारेर पहिले ब्याटिङको निम्तो पाएको मुम्बई इन्डियन्सले निर्धारित २० ओभरमा ६ विकेट गुमाएर २०३ रन बनाएको थियो। मुम्बईका लागि तिलक वर्मा र सूर्यकुमार यादवले समान ४४-४४ रनको योगदान गरे भने जोनी बेयरस्टोले ३८ रन जोडे। पञ्जाबका बलर अजमतुल्लाह उमरजईले २ विकेट लिए।
जुन ३ मा नयाँ च्याम्पियनको टुंगो
पञ्जाब किङ्स सन् २०१४ पछि पहिलो पटक आईपीएलको फाइनलमा पुगेको हो। अब उसले उपाधिका लागि जुन ३ मा अहमदावादकै नरेन्द्र मोदी स्टेडियममा रोयल च्यालेन्जर्स बेंगलुरु (आरसीबी) सँग प्रतिस्पर्धा गर्नेछ।
आरसीबीले क्वालिफायर-१ मा पञ्जाबलाई नै पराजित गर्दै फाइनलमा स्थान सुरक्षित गरिसकेको छ। पाँच पटकको च्याम्पियन मुम्बई इन्डियन्सको यस सिजनको यात्रा भने क्वालिफायर-२ बाटै समाप्त भएको छ। हार्दिक पाण्ड्याको कप्तानीमा रहेको मुम्बईले एलिमिनेटरमा गुजरात टाइटन्सलाई हराए पनि क्वालिफायर-२ मा भने जित हासिल गर्न सकेन।

पञ्जाब र आरसीबी दुवै टोलीले अहिलेसम्म आईपीएलको उपाधि चुम्न सकेका छैनन्। त्यसैले यसपटक प्रतियोगिताले नयाँ च्याम्पियन पाउने कुरा सुनिश्चित भएको छ, जसले आईपीएल इतिहासमा नयाँ अध्याय थप्नेछ।