एजेन्सी - भेनेजुएलामा गत बुधबार गएको ७.२ र ७.५ म्याग्निच्युडको शक्तिशाली भूकम्पमा परी मृत्यु हुनेको संख्या सोमबारसम्म १५ सय पुगेको छ। अन्तर्राष्ट्रिय समाचार संस्था रोयटर्सका अनुसार विपद्मा परि ३ हजार १५० जना घाइते भएका छन् भने १२ हजारभन्दा बढी विस्थापित भएका छन्। अमेरिकी भूगर्भ सर्वेक्षण (यूएसजीएस) ले यस विनाशकारी भूकम्पमा परी मृतकको संख्या १० हजार नाघ्न सक्ने अनुमान गरेको छ, जसका कारण यो शताब्दीकै सबैभन्दा घातक भूकम्पमध्ये एक बन्न सक्छ।

सबैभन्दा बढी प्रभावित तटीय राज्य ला ग्वाइरामा विदेशी उद्धार टोलीहरू परिचालन गरिएका छन् भने लगातारको परकम्पका बीच पनि उद्धार कार्य जारी छ। कार्यवाहक राष्ट्रपति डेल्सी रोड्रिगेजले उद्धार र पुनःस्थापना अभियान निरन्तर चलिरहेको र ला ग्वाइरामा ७५ प्रतिशत विद्युत् सेवा सुचारु भइसकेको जानकारी दिइन्। उद्धारका क्रममा आइतबार पनि केही मानिसहरूलाई भग्नावशेषबाट जीवितै निकालिएको छ। यद्यपि, विपक्षी दलले जारी गरेको अनलाइन सूचीअनुसार अझै करिब ५० हजार मानिस सम्पर्कविहीन रहेका छन्।

यसैबीच, पोप लियोले भूकम्पपीडितहरूप्रति ऐक्यबद्धता जनाउँदै उद्धारकर्मीहरूको प्रशंसा गरेका छन् भने अमेरिकी प्रशासनले थप सयौँ मिलियन डलरको राहत प्याकेज घोषणा गर्ने तयारी गरेको छ। भूकम्पको प्रभावका कारण भेनेजुएलाको सबैभन्दा ठूलो 'अमुआय तेल प्रशोधन केन्द्र' मा विद्युत् अवरोध भएपछि आइतबारदेखि त्यसको सञ्चालन समेत बन्द भएको छ।