२०८२ जेठ २७, मङ्गलबार
२०८२ जेठ २७, मङ्गलबार
आसन्न स्थानिय तहको निर्वाचनमा गठबन्धन गरेर नेकपा एमालेलाई हराउँने भन्दै हिँडेका दलहरु भित्रै किचलो देखिएको छ । सैद्धान्तीक रुपमा गठबन्धन गर्न सहमत भए पनि व्यवहारिक रुपमा भागबण्डा गर्न उनीहरुलाई कठिनाइ भएको देखिएको छ ।
चुनावको मिति नजिक आइसकेको र उमेदवारको अन्तिम टुंगो लगाउँन हतारो भएको अवस्थामा गठबन्धन आवद्ध दलहरुकोबीचमा भागबण्डाको मोडालिटीमा नै सहमती हुन सकेको छैन । पार्टी भित्रै आन्तरिक किचलोमा गुज्रीएको नेपाली कांग्रेसको नयाँ प्रस्तावले अन्य दलहरु सशंकित बनेका छन् ।
सत्ता गठबन्धनमा आबद्ध दलबीच स्थानीय तहको निर्वाचनमा चुनावी तालमेल गर्ने सहमति भए पनि सिट बाँडफाँटमा विमति देखिएको छ । सरकारको नेतृत्व गरिरहेको नेपाली कांग्रेसले पार्टीको हैसियत अनुसार सिट बाँडफाँट गर्नुपर्ने सर्त अघि सारेसँगै गठबन्धनमा आबद्ध चार दलले विमति जनाएका हुन् ।
नेपाली कांग्रेसका वरिष्ठ नेता रामचन्द्र पौडेलको नेतृत्वमा बुधबार बसेको निर्वाचन अनुगमन तथा तयारी समितिको पहिलो बैठकमा पाँच दलले सिट बाँडफाँटको मापदण्डबारे फरक-फरक प्रस्ताव अघि सारेका छन् ।
नेपाली कांग्रेस, माओवादी केन्द्र, एकीकृत समाजवादी, जनता समाजवादी पार्टी र राष्ट्रिय जनमोर्चाका शीर्ष नेताहरुले आफू अनुकूल तालमेल प्रस्ताव अघि सारेका छन् ।
सत्ता गठबन्धनको ठूलो दल कांग्रेसले गत निर्वाचनमा प्रमुख जसले जहाँ जितेको छ, उसले लिने र एमालेसहित अन्य दलले जितेको ठाउँमा दोस्रो धेरै मत पाएको दलले प्रमुख, तेस्रो धेरै मत पाउनेले उपप्रमुख लिने प्रस्ताव अघि सारेको छ । उक्त प्रस्ताव माओवादीसहित अन्य दलले स्वीकार नगर्ने चेतावनी दिन शुरू गरेका छन् । आजको नेपाल समाचार पत्र दैनिकमा समाचार छ ।
