काठमाडौं- आसन्न प्रतिनिधिसभा र प्रदेशसभा निवार्चनमा गठबन्धन गर्ने निर्णय गरेका सत्तारुढ दलहरुबीच भागबण्डाको बिषय पेचिलो बन्दै गएको छ । सबै दलहरुले धेरै सिटमा दाबी नछाडेपछि भागण्डा मिलाउन सकस परेको देखिएको छ ।

प्रधानमन्त्री तथा कांग्रेस सभापति शेरबहादुर देउवा केही लचिलो हुने पक्षमा देखिएपनि पार्टीभित्रकै प्रतिपक्ष (नेता शेखर कोइराला समूह)को धेरै सिट लिनुपर्छ भन्ने दबाबमा छन् । यसैगरी तल्लो तहका कतिपय समिति पनि धेरै सिट संख्यामा दाबी नछाड्नुपर्ने र दाबी गरिएजत्ति सिट नपाइए एक्लै लड्नुपर्ने पक्षमा छन् ।

कांग्रेस डोटीको केही दिनअघि एक्लै लड्ने निर्णय गरिसकेको छ । कांग्रेसको यो निर्णयले पूर्वमन्त्रीसमेत रहेका नेकपा एकीकृत समाजवादीका नेता प्रेम आले आक्रोशित भएका छन् । कांग्रेसमाथि आक्रोश पोख्दै उनले डोटीमा गठबन्धन नगर्ने भए कुनै जिल्लामा पनि गर्नु नहुने बताएका छन् ।

सोमबार पार्टी केन्द्रीय कार्यालयमा आयोजित नेपाल मगर संघ (समाजवादी)को तेस्रो राष्ट्रिय भेलालाई सम्बोधन गर्दै नेता आलेले डोटी जिल्लामा गठबन्धन चाहिँदैन भनेर भेला गर्दै हिँडेको भन्दै असन्तुष्टि व्यक्त गरेका हुन् । उनले गठबन्धन गर्ने भएपनि ७७ वटै जिल्लामा हुनुपर्ने नभए कतै पनि गर्न नहुने बताए ।

नेता आलेले गत स्थानीय तह निर्वाचनमा आफूहरूले १० वटा वडामा मात्रै उम्मेदवार उठाएर ५५ वटा वडा छाडिएको भन्दै यसैको मतको आधारमा नेपाली कांग्रेसले आफूहरुको मत कम रहेको व्याख्या गरिरहेको बताए । उनले स्थानीय निर्वाचनको परिणामको आधारमा गठबन्धनबाट विद्रोहको प्रयास भइरहेको उल्लेख गर्दै त्यसप्रति आफूहरुको ध्यानाकर्षण भएको बताए ।