काठमाडौं। चिकित्सा शिक्षा आयोगले स्नातक तहका महत्त्वपूर्ण कार्यक्रमहरू, एमबीबीएस र बीडीएसको सिट संख्या बढाउने निर्णय गरेको छ। मंगलबार सिंहदरबारमा बसेको आयोगको २१औँ बैठकले यसअघि तोकिएको सिटमा वृद्धि गर्ने महत्त्वपूर्ण निर्णय गरेको हो।

आयोगले पहिले गठन गरेको सिट निर्धारण समितिको सिफारिसलाई आधार मान्दै नयाँ सिट संख्या तोकेको हो। नयाँ व्यवस्थाअनुसार, यसअघि अधिकतम १०० सिट रहेका एमबीबीएस कार्यक्रम सञ्चालन गर्ने कलेजहरूले अब मापदण्ड पूरा गरेमा १३० सिटसम्म र ५० सिट रहेका बीडीएस कार्यक्रमले ६० सिटसम्म सञ्चालन अनुमति पाउनेछन्।

आयोगको निर्णयअनुसार, सबैभन्दा धेरै अर्थात् १३० सिट पाउने मेडिकल कलेजहरूमा विराट मेडिकल कलेज, चितवन मेडिकल कलेज र कलेज अफ मेडिकल साइन्सेस रहेका छन्। त्यसैगरी, पोखरास्थित मणिपाल शिक्षण अस्पतालले १२० सिट पाएको छ।

स्मरणीय छ, यसअघि गत असारमा बसेको आयोगको २०औँ बैठकले प्राविधिक शिक्षा तथा व्यावसायिक तालिम परिषद् (सीटीईभीटी) अन्तर्गतका चिकित्सा शिक्षातर्फका प्रमाणपत्र तहका कार्यक्रमहरूको सिट निर्धारण प्रक्रिया अघि बढाउने निर्णय गरेको थियो।