काठमाडौं - नेपाली मार्सल आर्ट्स (MMA) फाइटर रवीन्द्र ढाँट ‘रोड टु युएफसी’को पाँचौँ सिजनको बान्टमवेट विधाको फाइनलमा प्रवेश गरेका छन्। चीनको साङ्घाईस्थित अक्टागनमा शुक्रबार भएको सेमिफाइनलमा न्युजिल्यान्डका अपराजित खेलाडी कासिब मर्डकलाई स्प्लिट डिसिजनका आधारमा पराजित गर्दै २७ वर्षीय रवीन्द्रले ऐतिहासिक फाइनल यात्रा तय गरेका हुन्।

अब उपाधिका लागि रवीन्द्रको भिडन्त जापानका र्यो ताजिमासँग हुनेछ। अर्को सेमिफाइनलमा ताजिमाले भारतका चुन्ग्रेङ कोरेनलाई युनानिमस डिसिजनबाट हराउँदै फाइनलमा स्थान बनाएका थिए। व्यावसायिक एमएमएमा १० जित र १ हारको सानदार रेकर्ड बनाएका रवीन्द्रले यो फाइनल जितेमा विश्वको सबैभन्दा ठूलो एमएमए मञ्च 'युएफसी' (UFC) सँग आधिकारिक सम्झौता गर्ने पहिलो नेपाली खेलाडी बनेर इतिहास रच्नेछन्।