भरतपुर । नारायणगढ–मुग्लिन सडकखण्ड आज बिहानै सुक्खा पहिरोका कारण दुईतर्फी अवरुद्ध भएको छ। बिहान ६:३५ बजे इच्छाकामना गाउँपालिका–५ स्थित तुइनखोलामा ठूलो चट्टानसहितको पहिरो खस्दा सडकखण्ड पूर्ण रूपमा ठप्प भएको हो।

इलाका प्रहरी कार्यालय मुग्लिनको विपद् व्यवस्थापन टोली सडक सुचारुका लागि घटनास्थलमा खटिएको प्रहरी निरीक्षक प्रतीक सिंहले जानकारी दिए।

उनका अनुसार, स्काभेटर प्रयोग गरेर पहिरो पन्छाउने काम युद्धस्तरमा भइरहेको छ। पहिरोका कारण गन्तव्यतर्फ लागेका सयौँ सवारीसाधन बाटोमै रोकिएका छन्, जसले गर्दा यात्रुहरूले सास्ती भोग्नुपरेको छ।

नारायणगढ–मुग्लिन सडकखण्ड पहिरोको जोखिममा पर्ने यो पहिलो घटना भने होइन। यस सडकखण्ड बारम्बार पहिरोका कारण अवरुद्ध हुँदै आएको छ।