काठमाडौं- निर्देशक ऋषि लामिछानेद्वारा निर्देशित तथा हास्यकलाकार केदार घिमिरे (माग्ने बुढा) को मुख्य अभिनय रहेको चलचित्र ‘माग्ने राजा’ को ट्रेलर सार्वजनिक भएको छ। बिहीबार काठमाडौंमा आयोजित एक कार्यक्रममा चलचित्रको ३ मिनेट ४० सेकेन्ड लामो ट्रेलर देखाइएको हो।

सार्वजनिक ट्रेलरले चलचित्रको कथासार र चरित्रलाई प्रस्ट्याएको छ। ट्रेलर हेर्दा एक साधारण गाउँले युवकको बिना मिहिनेत धनी बन्ने सपना र त्यसपछिको यात्रालाई चलचित्रले मुख्य विषय बनाएको बुझिन्छ। ट्रेलरको मुख्य आकर्षण नै शीर्ष भूमिकामा रहेका केदार घिमिरे हुन्, जसलाई विभिन्न अवतारमा प्रस्तुत गरिएको छ।

ट्रेलरमा केदारका साथै वर्षा सिवाकोटी, विल्सन विक्रम राई, शिशिर बाङ्देल र शारदा गिरी जस्ता कलाकारलाई पनि महत्त्वपूर्ण स्थान दिइएको छ। यसका साथै, गायिका तथा पूर्व राष्ट्रिय सभा सदस्य कोमल वलीलाई न्यायाधीशको भूमिकामा र ‘मिस पबी’ लाई टेलिभिजन प्रस्तोताको रूपमा देख्न सकिन्छ। चलचित्रमा अभिनेता आर्यन सिग्देलको पनि विशेष भूमिका रहेको छ।

हास्यकलाकारको रूपमा परिचित केदार घिमिरेले शीर्ष भूमिकामा अभिनय गरेको यो पहिलो चलचित्र हो। यसअघि उनी सहायक भूमिकामै सीमित थिए। चलचित्रले देशको सामाजिक, आर्थिक र राजनीतिक अवस्थामाथि व्यङ्ग्य गर्दै बिना मिहिनेत पैसा कमाउनु हुँदैन भन्ने सन्देश दिन खोजेको छ। ट्रेलरले दर्शकमाझ चलचित्रप्रति कौतूहलता जगाएको छ।

आरम्भ प्रोडक्सनको ब्यानरमा बनेको यस चलचित्रका प्रस्तुतकर्ता तथा निर्माता मुनाल घिमिरे हुन्। उनी दाङको घोराही उपमहानगरपालिका-४ का वडा अध्यक्ष पनि हुन्। सामीप्य राज तिमल्सेनाको कथा, पटकथा र संवाद रहेको चलचित्रलाई नरेन्द्र मैनालीले खिचेका हुन्। यसमा दीपक शर्मा र बाबुल गिरीको संगीत छ।

आरआर फिल्मस्ले वितरण गर्ने यो चलचित्र आगामी भदौ ६ गतेदेखि देशभरका सिनेमाघरमा प्रदर्शन हुनेछ।