२०८२ भदौ १४, शनिवार
२०८२ भदौ १४, शनिवार
वीरगञ्ज - वीरगञ्ज महानगरपालिकामा हैजाको सङ्क्रमण फैलिने क्रम रोकिएको छैन। तीनै तहका सरकारको प्रयासका बाबजुद सङ्क्रमितको सङ्ख्या बढ्दै गएको छ। सोमबारसम्म यहाँ हैजाबाट सङ्क्रमित हुनेको सङ्ख्या ९३ पुगेको छ।
आइतबार बेलुकासम्म ७१ जनामा हैजा पुष्टि भएकोमा सोमबार यो सङ्ख्या बढेको हो। स्वास्थ्य कार्यालय पर्साका जनस्वास्थ्य अधिकृत जयमोद ठाकुरका अनुसार, हालसम्म झाडापखाला र हैजाका कारण ३४४ जना अस्पताल पुगेका छन्। तीमध्ये १६६ जना विभिन्न अस्पतालमा उपचाररत छन् भने १७८ जना उपचारपछि निको भएर घर फर्किसकेका छन्।
कुन अस्पतालमा कति सङ्क्रमित?
सङ्क्रमितहरू वीरगञ्जका विभिन्न अस्पतालमा उपचार गराइरहेका छन्। सबैभन्दा बढी नारायणी अस्पताल र तराई अस्पतालमा ३२/३२ जनामा हैजाको सङ्क्रमण पुष्टि भएको छ।
यसैगरी, नेशनल मेडिकल कलेजमा १२ जना, भवानी अस्पताल, वीरगञ्ज हेल्थ केयर र मङ्गलम प्याथोलोजीमा ३/३ जना तथा अर्ली अर्थो अस्पतालमा २ जनामा सङ्क्रमण देखिएको छ।
यसबाहेक नारायणी सेन्ट्रल, एड्भान्स मेडिकेयर, नेपाल इन्डो, नीलकण्ठ, नेपाल मेडिसिटी बयोधा र सर्वोत्तम अस्पतालमा पनि एक/एक जना हैजाका बिरामी भेटिएका छन्।
हाल उपचाररत बिरामीमध्ये २७ जनाको आइसियुमा, ६ जनाको एचडिसियुमा र बाँकी १२२ जनाको जनरल वार्डमा उपचार भइरहेको स्वास्थ्य कार्यालयले जनाएको छ।
