काठमाडौं । अस्ट्रेलियाको नर्दन टेरिटोरीमा जारी टप एन्ड टी-२० सिरिज अन्तर्गत नेपालले आफ्नो अन्तिम लिग खेलमा आज पाकिस्तान शाहिन्सको सामना गर्दैछ। सेमिफाइनल प्रवेशको गणितीय सम्भावना कायम राख्न नेपाललाई यो खेलमा फराकिलो जित आवश्यक छ।

डार्विनस्थित मरारा क्रिकेट ग्राउन्ड-२ मा हुने यो खेल नेपाली समयअनुसार दिउँसो ३:१५ बजे सुरु हुनेछ।

प्रतियोगितामा खराब सुरुवात गरेको नेपाल पछिल्ला दुई खेलमा उत्कृष्ट पुनरागमन गर्दै लयमा फर्किएको छ। सुरुवाती तीन खेलमा लगातार पराजय भोगेको नेपालले त्यसपछिका खेलमा होबार्ट हुरिकेन्सलाई ६६ रनले र मेलबर्न रेनेगेड्सलाई ३३ रनले हराउँदै सनसनीपूर्ण जित निकालेको थियो। यसअघि नेपाल एनटी स्ट्राइक, बंगलादेश 'ए' र मेलबर्न स्टार्ससँग पराजित भएको थियो।

हालसम्म ५ खेल खेलेको नेपालले ४ अंक जोडेर अंक तालिकाको सातौं स्थानमा छ। अर्कोतर्फ, ५ खेलबाट ६ अंकसहित पाकिस्तान शाहिन्स दोस्रो स्थानमा छ र उसको सेमिफाइनल खेल्ने सम्भावना बलियो छ।

११ टोली सहभागी प्रतियोगितामा लिग चरणका खेल सकिएपछि शीर्ष चार टोलीले सेमिफाइनलमा स्थान बनाउनेछन्। सेमिफाइनलमा पुग्न नेपालले आज पाकिस्तानलाई फराकिलो अन्तरले हराउनै पर्छ र शीर्ष चारमा पर्न अन्य टोलीहरूको नतिजा पनि आफ्नो पक्षमा आउनुपर्नेछ।