काठमाडौं । प्यालेस्टिनी सशस्त्र समूह हमास गाजामा युद्धविराम र बन्धक रिहाइसम्बन्धी नयाँ प्रस्तावमा सहमत भएको छ। क्षेत्रीय मध्यस्थकर्ता, विशेषगरी कतारको पहलमा तयार पारिएको प्रस्तावलाई हमासले स्वीकार गरेको अन्तर्राष्ट्रिय सञ्चारमाध्यमले जनाएका छन्।

बीबीसीका अनुसार, यो प्रस्ताव अन्तर्गत प्रारम्भिक रूपमा ६० दिनको युद्धविराम हुनेछ। यस अवधिमा हमासले इजरायली बन्धकहरूलाई चरणबद्ध रूपमा रिहा गर्नेछ। साथै, स्थायी युद्धविरामका लागि थप वार्ता अघि बढाइनेछ। हमासले बाँकी रहेका बन्धकहरूमध्ये करिब २० जना जीवित हुन सक्ने अनुमान गरेको छ।

यद्यपि, हमासको यो सहमतिप्रति इजरायलले भने कुनै आधिकारिक प्रतिक्रिया दिएको छैन। यसअघि प्रधानमन्त्री बेन्यामिन नेतन्याहूको कार्यालयले सबै बन्धकलाई एकैपटक रिहा नगरिएसम्म कुनै पनि सम्झौता स्वीकार नगर्ने अडान राख्दै आएको थियो।