काठमाडौं। प्रधानमन्त्री केपी शर्मा ओलीलाई भारत भ्रमणको औपचारिक निमन्त्रणा दिन भारतीय विदेश सचिव विक्रम मिश्री आज काठमाडौं आइपुगेका छन्। उनी भारतीय वायुसेनाको विशेष विमानमार्फत त्रिभुवन अन्तर्राष्ट्रिय विमानस्थलमा अवतरण गरेका हुन्।

परराष्ट्र सचिव अमृतबहादुर राईको निमन्त्रणामा नेपाल आएका मिश्रीले काठमाडौंमा रहँदा उच्चस्तरीय भेटवार्ता गर्नेछन्। उनले सुरुमा आफ्ना नेपाली समकक्षी राईसँग भेट गर्ने र त्यसपछि प्रधानमन्त्री केपी शर्मा ओली, परराष्ट्रमन्त्री आरजु राणा तथा नेपाली कांग्रेसका सभापति शेरबहादुर देउवालगायतका शीर्ष नेताहरूसँग भेट्ने कार्यक्रम तय भएको छ।

भेटका क्रममा मिश्रीले भारतीय प्रधानमन्त्री नरेन्द्र मोदीका तर्फबाट प्रधानमन्त्री ओलीलाई भारत भ्रमणको औपचारिक निम्तो हस्तान्तरण गर्नेछन्। प्रधानमन्त्री ओली यही भदौ ३१ मा भारत भ्रमणमा जाने तयारी भइरहेको छ।

प्रधानमन्त्री नियुक्त भएको १४ महिनापछि हुन लागेको यो भ्रमणका एजेन्डा तय गर्न मिश्रीको भ्रमण महत्वपूर्ण मानिएको छ। भ्रमणका क्रममा दुई देशका परराष्ट्र सचिवस्तरीय बैठकमा नेपाल-भारत साझेदारीका विभिन्न पक्षमा समेत छलफल हुने बताइएको छ।