भरतपुर- चितवन क्षेत्र नं. ३ का उम्मेदवार तथा राष्ट्रिय प्रजातन्त्र पार्टीका वरिष्ठ उपाध्यक्ष विक्रम पाण्डेले चितवनवासी युवाको समस्याको जिम्मा आफूले लिने बताउनु भएको छ । चुनावी घरदैलोका क्रममा भरतपुर महानगरपालिका वडा नं. ८ सगरमाथा टोलमा भएको कार्यक्रममा नेता पाण्डेले भन्नुभयो-‘हरेक युवाको समस्या र सरकारी झमेलाको जिम्मा मलाई दिनुहोस् ।’

कुनै पनि निर्वाचनमा जित्दा या हार्दा सधैँ चितवनवासीकै साथमा रहेकोले एकपटक पुनः संसदमा जाने बाटो खुला गरिदिन उहाँले आग्रह गर्नुभयो । ‘म हरेक समस्यासँग लड्न तयार छु,’ उनले भने, ‘समस्या र संघर्षमा म सधैँ रमाउने मान्छे हुँ ।

त्यसैले डराएर कहिल्यै भाग्दिनँ ।’ ३२ वर्षे राजनैतिक यात्रामा चुनाव लडेकै २५ वर्ष भइसकेकोले अबको समय पनि चितवनवासीकै लागि समर्पण गरिने उहाँको भनाइ छ ।