काठमाडौं - सरकारले नेपाल प्रहरीको प्रहरी महानिरीक्षक (आइजिपी) पदमा चन्द्रकुबेर खापुङलाई नियुक्त गर्ने निर्णय गरेको छ ।

शुक्रबार बसेको मन्त्रिपरिषदको बैठकले खापुङलाई आइजिपी नियुक्त गर्ने निर्णय गरेको स्रोतले जनाएको छ । उनी हाल एआइजीका रूपमा केन्द्रीय अनुसन्धान ब्युरो (सिआइबी) का प्रमुख छन् ।

वर्तमान आइजिपी दीपक थापा भदौ १८ गते राति १२ बजेदेखि अवकाशमा जाँदैछन् । उनी अवकाशमा गएसँगै खापुङ नेपाल प्रहरीको ३२औं आइजिपी हुनेछन् ।

प्रधानमन्त्री केपी शर्मा ओली शनिबार चीन भ्रमणमा जाँदैछन् । भ्रमणमा जानुअघि नै बसेको मन्त्रिपरिषदको बैठकले आइजिपी नियुक्त गरेको हो । प्रधानमन्त्री ओली भदौ १८ गते फर्किनेछन् । त्यसकारण मन्त्रिपरिषदको बैठकले प्रधानमन्त्रीको भ्रमण अघि नै आइजिपी नियुक्त गर्ने निर्णय गरेको हो ।

२०२७ सालमा जन्मिएका खापुङ २०५२ सालमा प्रहरी निरीक्षकका रूपमा नेपाल प्रहरीको सेवामा प्रवेश गरेका थिए ।

नयाँ प्रहरी विधेयक पारित भएर कार्यान्वयनमा नआएमा उनी करिब तीन महिनाका लागि मात्रै आइजिपी बन्नेछन् । प्रहरी नियमावली अनुसार उनी पनि ३० वर्षे सेवा हदकै कारणले मंसिर २३ गतेसम्म मात्रै प्रमुख हुनेछन् । प्रहरी विधेयक आएको अवस्थामा भने फरक पर्न सक्नेछ ।