काठमाडौं - शुक्रबार नेपाली बजारमा सुनको मूल्यले नयाँ कीर्तिमान कायम गरेको छ। यसअघि साउन २३ गते बनेको रेकर्डलाई तोड्दै सुनको भाउ हालसम्मकै उच्च बिन्दुमा पुगेको हो।

नेपाल सुनचाँदी व्यवसायी महासंघका अनुसार, आज सुनको भाउ प्रतितोला २ लाख ६ सय रुपैयाँ पुगेको छ। यो मूल्य अघिल्लो दिनको तुलनामा प्रतितोला १२ सय रुपैयाँले महँगिएको हो। यसअघि साउन २३ गते सुनको मूल्य १ लाख ९९ हजार ४ सय रुपैयाँ रहेको थियो।

सुनसँगै चाँदीको मूल्य पनि बढेर नयाँ उचाइमा पुगेको छ। चाँदी प्रतितोला ५ रुपैयाँले बढेर २ हजार ३ सय ६० रुपैयाँमा कारोबार भइरहेको छ। अघिल्लो दिन चाँदीको मूल्य २ हजार ३ सय ५५ रुपैयाँ थियो।

महासंघका प्रथम उपाध्यक्ष धर्मसुन्दर बज्राचार्यका अनुसार अन्तर्राष्ट्रिय बजारमा मूल्य बढेका कारण नेपाली बजारमा पनि यसको प्रत्यक्ष प्रभाव देखिएको हो। उनले भने, ‘अन्तर्राष्ट्रिय बजारमा जसरी मूल्य घटबढ हुन्छ, त्यसैगरी नेपाली बजारमा समायोजन हुँदै आएको छ।’ अन्तर्राष्ट्रिय बजारमा सुनको भाउ प्रतिऔंस ३४ सय डलरभन्दा बढी पुगेको छ।