काठमाडौँ - आगामी भदौ ३ गतेदेखि काठमाडौँमा सुरु हुने नाडा अटो शोको प्रमुख आकर्षण मानिएको 'उड्ने कार' अरनिको राजमार्गमा खसेको पहिरोका कारण तातोपानी नाकामै रोकिएको छ। करिब दुई हप्तादेखि अवरुद्ध राजमार्गका कारण उक्त कारलाई जोखिमपूर्ण तरिकाले पहिरो पार गराएर नेपाली भन्सारसम्म ल्याइएको छ।

सिन्धुपाल्चोकको भोटेकोशी गाउँपालिका–२, कोदारीस्थित ईकु क्षेत्रमा साउन १८ गते बिहान खसेको ठूलो पहिरोले सडक पूर्ण रूपमा बन्द भएपछि, शुक्रबार कामदारहरूको सहयोगमा कारलाई काँधमा बोकेरै पहिरो ग्रस्त क्षेत्र पार गराइएको थियो। हाल उक्त कार तातोपानीस्थित नेपाली भन्सार यार्डमा आइपुगेको र भन्सार प्रक्रिया पूरा भएपछि मात्र काठमाडौँ पठाइने जानकारी प्राप्त भएको छ।

चीनसँगको प्रमुख व्यापारिक नाका जोड्ने अरनिको राजमार्ग ठप्प हुँदा नेपाल-चीन व्यापार चक्र नै प्रभावित बनेको छ। नाडा अटो शोका लागि ल्याइएको कार एउटा प्रतिनिधि घटना मात्र हो; सयौँ कन्टेनरमा रहेका अन्य व्यावसायिक तथा औद्योगिक सामग्रीहरू पनि सीमामा अलपत्र परेका छन्, जसले बजारमा सामान आपूर्तिमा गम्भीर असर पारेको छ।

सडक सञ्चालनमा आउन ढिलाइ हुँदा स्थानीय बासिन्दा र व्यापारीहरूको चिन्ता बढेको छ। अत्यावश्यक सामग्री र व्यापारिक सामानहरू ढुवानी गर्न व्यवसायीहरूले ज्यानकै जोखिम मोलेर कामदारमार्फत पहिरो भएको क्षेत्र वारपार गराउन बाध्य भएका छन्। यद्यपि, स्थानीय प्रशासनले उक्त क्षेत्रमा सतर्कता अपनाउन र जोखिमपूर्ण यात्रा नगर्न आग्रह गरेको छ।